4 نصايح تمنيت احد قالها لي في بداية تعلم اللغة اليابانية

مرحبا مينا ~

久しぶり～

من زمان ما كتبت هنا، لهيت بالمشروع الجديد حقي (المكتبة اليابانية) اذا ما كنتوا تدرون عنها ｘD

ببساطة مكتبة خاصة لبيع الكتب اليابانية و نشحن لكل مكان بالعالم واهووو ~

وفيها إمكانية استعارة اذا كنتوا بالدمام او الخبر (او زائرين)

نرجع لموضوعنا اللي جاني إلهامه امس لما جيت أنام، ببساطة 4 نصائح اقولها لكم عشان ما تغلطون نفسي ~

 

1- قراءات الكونيومي و الاونيومي للكانجي

أول شي أقول لكم حطو اكس كبيررررر عليه، متخيلين اني قعدت 3 سنوات ضايعه بسببهم؟؟؟ ومني عارفه كيف ادرس كانجي بسببهم؟؟ ببساطة أشياء تضيع وقتك و جهدك ع الفاضي و خلينا نشوف مثال

5 قراءات و بالاخير ما نستخدم الا وحدة!! ما مر علينا الا وحدة! و حتى لو سبق ومرت عليكم قراءة ثانية فهي حالة شاذة

يعني من الاخير لا تتعبون نفسكم ارجوكم

هنا كتبت موضوع عن الطريقة الصحيحة لدراستهم و ازيد عليها انه كل ما كثرتوا قراءة باللغة اليابانية راح تزيد كمية الكانجيات عندكم وبلا كونيومي و بلا اونيوني

2- تصريف الافعال و التي فورم

……ايش اقول ايش اخلي التي فورم تعقدت منها وكرهت الدروس حقتها و تعبت فيها اخر شي اكتشفت انه ما يفيد حفظها أنما ممارسة اللغة والقراءة الكثيرة هي اللي راح تثبته براسج بدون تعب، يعني تخيلوا تقعدون ايام تدرسون و تحفظون و بعدين تنسون و تتحطمون و تأخذون بريك من القهر بينما ببساطة تقدرون تاخذون فكره عنها و تكملون دراستكم و تقرون قصص او اي شي بالياباني عشان تثبتها هي و الكانجي بدل كل المعاناة السابقة (طبعاً ما اقصد انه قراءة قصة وحدة بثبتها في راسكم لا اقصد القراءة أفضل بكثير من الحفظ بالذات في الكانجي و تصريف الافعال أو حتى الكلمات، لا تضيعون وقتكم تحفظون إنما أقروا مكانه)

3- الدراسة من مصدر واحد (غلط)

في ناس ممكن تختلف معي بهذه النقطة لكن! خلونا نتخيل 3 اشخاص ماسكين كتاب (او موقع مثلاً) و زهقوا منه، ايش راح يسوون؟ الأول أخذ بريك لانه زهق والثاني والثالث أخذوا كتاب آخر (أو مصدر دراسة ثاني سواء كتاب او موقع او حتى قصة ومانجا) وهنا راح اقسمهم قسمين شخص مسك الكتاب الثاني و قعد يتصفحه و يدرس عشوائي منه (يتوقع انه قاعد يستفيد لكن الدراسة العشوائية غلط) و شخص آخر حاط له هدف أنه يدرس أول درسين هذا الشهر (أو يخلص اول فصلين من كتاب ياباني معين).

بنظركم اي واحد استفاد أكثر؟

أنا جربت طريقة أني أدرس من مصدر واحد عشان ما اتلخبط وبعد مدة طويلة جربت ادرس من أكثر من مصدر مع تخطيط و اكتشفت اني انجزت واستفدت بالطريقة الثانية أكثر!

فائدة الدراسة من أكثر من مصدر:

أ- تخليكم ما تزهقون

ب- تثبت معلوماتكم

ج- تشرح لكم اشياء جديدة ماكانت بالكتاب الأول أو تشرح لكم اشياء ماكنتوا فاهمينها بالكتاب الأول

د- تكتشفون انكم تعرفون اشياء كثير باللغة فتتحمسون و تكملون تدرسون وأنتم سعداء

ملاحظة: هذي الطريقة أنصح فيها بعد ما تدرسون الأساسيات، يعني يفضل بالبداية تدرسون من كتاب واحد و بعدين تبدوا تضيفوا مصادر ثانيه لان غالباً اذا كنتوا بالبداية ماراح تحسون بالزهق.

و هنا انتقل لأخر نقطة اللي هي مرتبطة بالنقطة ثلاثة الا وهي..

4- الدراسة العشوائية بدون هدف (غلط)

الشخص الثاني كان يدرس عشوائي بس الدراسة العشوائية مالها فايدة لأنها تخليك تحس انك ما خلصت الدرس الفلاني جدياً، وتحتاج تعيده مره ثانيه عشان تستفيد، نصيحتي لكم حطوا لكم أهداف شهرية (وليس سنوية اللي تتحمسون معها بداية السنة بعدين يروح الحماس)

مثلاً الشهر هذا أبغى أخلص اول درسين من الكتاب الفلاني و أول فصلين من الكتاب الثاني و ابغى اخلص مجلد مانجا

و الشهر الثاني ابغى اخلص ثالث درس من الكتاب الفلاني و ثالث و رابع و خامس فصل من الكتاب الثاني

والشهر الثالث ….

وهكذا

طبعاً ذا مثال، سوه بالطريقة اللي تناسبكم و الكمية اللي تناسبكم بس اهم شي لا تحطون اشياء كثير عشان ما تضغطون على نفسكم.

وخلوا فيه مرونه يعني عادي بنص الشهر غيرتوا من الخطة حقتكم عشان تناسبكم.

 

هل فيه أحد مره بنفس معاناتي ｘD？

هل فيه أشياء ثانيه تمنيتوا احد قالها لكم قبل؟

وكيذا انتهيت موضوع الشهر نراكم لاحقاً ~