كيفية دراسة الكانجي

السلام عليكم و رحمة الله و بركاته ~

الكانجي يعتبر من اصعب الاشياء اللي يواجها أي شخص عند دراسة الكانجي و ممكن يكرها و يستسلم بسببها

انا اليوم بقولكم بعض النصايح + مواقع او تطبيقات حلوة تساعدكم و تسهل عليكم كثير

طبعا الكلام اللي بقوله من تجربتي و ممكن بعضكم يشوف طريقتي غلط بالذات اللي الكتابة باليد عنده مهمه ..عن نفسي صراحة اخر همي الكتابة .. اقصد ما اشوف لها أي فايدة في عصر التكنولوجيا (اللي بس تكتب الهيراغانا  بالكيبورد و يطلع لك الكانجي حقها) قبل لا تبدأ فكر انت تبي تتعلم اللغة اليابانية ليش؟ عشان تتعرف على يابانين؟ تتابع انيمي؟ تقرأ مانجا؟ طيب فكر الحين هل الكتابة باليد مهمه في ذي الحالات؟ و اكرر الكتابة باليد وليس الكيبورد.. اذا لا فأذن لا تضيع وقتك عليها

السالفة الحين صارت اقل صعوبه صح؟ في نظري انك ما يحتاج تتعلمها الا اذا كنت تدرس باليابان او تشتغل فيها (وعلى فكرة الشغل مو دايم تحتاج الكتابه فيه) + اذا كانت صعبه عليك لا تترك اللغة كلها بسببه استغني عنها ما بيصير لك شي ترى

شاي ثاني اشوف ماله داعي اللي هو قراءات الأونيومي و الكونيومي (وهي القراءات الصينية واليابانيةعلى التوالي) ادري الحين بتقولون لي شخلتي لنا بس اصبروا شوي انا قاعده اساعدكم

الحين بالله وشو احسن تحفظ نطق كلمة كاملة ولا نطق نص كلمة؟ كلمة كاملة اكيد صح؟ طيب وشو أحسن انك اذا شفت كلمة تعرف قرايتها على طول ولا انك تحزر أي قراءة من اللي تعلمتهم مناسبة صح؟ الخيار الاول صح؟

أهم شي تحطه براسك انه الكانجي الواحد ممكن يختلف نطقه على حسب الشي المرتبط فيه عشان كيذا اذا شفت كانجي نطقه غير عن النطق اللي تعرفه فلا تنصدم

نبدأ ألحين عن افضل طريقة لتعلمها و بقول لكم تطبيقات حلوه تساعدكم مره بذا الشي ان شاء الله

ابدأ من كانجيات المرحلة الاولى

اهم اهم اهم نصيحه اقدمها انك كمبتدئ لازم لازم تدرس مثل ما يدرسون المبتدئين باليابان! يا انك تمسك كانجيات اول ابتدائي و تحفظها بعدين تنتقل لثاني و هكذا وعلى فكرة لو كنت تعتبر ذي الطريقة تفشل فسوري انت منت قد الدراسة

الصف الأول 80 كانجي / الصف الثاني 160 كانجي / الصف الثالث و الرابع 200 كانجي / الصف الخامس 185 / الصف السادس 181 كانجي و المرحلة المتوسطة مجموع كانجياتها 934 كانجي

الطريقة الثانية انك تدرسها على حسب تصنيفها لاختبار JPLT وهو اختصار لـ أختبار المهارة باللغة اليابانية و هو مقسم لخمس مستويات N5 يعتبر اقل مستوى بينما N1 الاعلى و الاصعب حيث أن

N5 يحتوي على 149 كانجي / N4 يحتوي على87 كانجي / N3  يحتوي على 289 / N2 يحتوي على 51 كانجي / N1  يحتوي على 96 كانجي

و هذا الاختبار مقسم الكلمات ايضا (الفوكبلري) لخمس اقسام بنفس الطريقة لكن بعد اكبر حيث انه ان5 يحتوي على 558 كلمة و ان1 يحتوي على 1963 كلمة

فحلو تدرسون الكلمات ايضا من تقسيمات هذا الاختبار

استخدام البطاقات التعلمية

وحده من أفضل الطرق.. تتعلم و تراجع بنفس الوقت وفيه مواقع كثيره تقدم هذي الخاصية و اكثرها شهره هو

Anki

 نسخة الحاسب و الاندرويد مجانية بينما الايفون بفلوس *قلب مكسور* و كبداية لك في عالم الكانجي يفضل ان تستخدمها كل يوم و حاول ابد ابد ما تستهين فيها.. واذا ما بغيت انكي فا فيه مواقع ثانيه اكتب

kanji flashcards

و بتطلع لك مواقع ثانية

Twitter

عمل حساب جديد ما تتابعون فيه الا ناس يابانية! و ناس من نفس اهتماماتكم (حلو انه الجوالات الحين تقدرون تسون اكثر من حساب بدون ما تتعب نفسك تسوي تسجيل دخول ولا خروج بين حسابك الاصلي  + و طبعا اذا كنتوا من عشاق الايدولز او السيو تسون لهم فلوا) ثاني شي ابدوا اكتبوا أي شي بسيط و استخدموا فيه كلمات تعلمتوها و لا تستحون من الغلط لانه شي طبيعي و حاولوا تتفاعلون مع اليابانين و تترجمون كلامهم و تردون عليهم هذا كثير كثير بفيدكم بالتعود و الحفظ و كل ما كنتوا انشط فيه كانت النتيجة افضل

8-lang

وهوموقع مهم لجميع متعلمي اللغات أي كانت. طريقة عمله انك تسجل و تحط ايش لغتك الام و ايش اللغة اللي تتعلمها و تنزل بعدها موضوع باللغة اليابانية و يجيك شخص ياباني يصحح لك اخطاءك و بنفس الطريقة بالصفحة الرئيسة تطلع لك مواضيع باللغة العربية من اجانب و انت تصحح لهم طبعا التصحيح لهم مو ضروري بس المساعدة حلوة ترى =P  و بعد بفيدك سواء بالكانجي او اللغة بشكل عام

قراءة مانجا تحتوي على فوريغانا

أول شي ماهي الفوريغانا؟ هي حروف هيراغانا صغيرة مكتوبه فوق الكانجي عشان تسهل القراءة للصغار و كل ما كانت المانجا للكبار أكثر كل ما قلت الفوريغانا او اختفت بشكل تام علاقة طردية كح

هي اكثر الطرق الممتعة بالنسبة لي وامارسها حاليا و في الوقت الحالي صارت اسهل بكثير من قبل حيث وفرت شركة قوقل شفيني مره اتكلم فصحه مره عامي خاصية جديدة في تطبيق المترجم حقهم بالجوال وهو تصوير مقطع و يترجمه لك. مررره فادني بالذات بعض الاحيان لما يكتبون كلام جانبي باليد و يكون صغيراو لما تشوف فان ارت مثلا و تبي تعرف ايش مكتوب بس الفوريغانا مو موجودة (وبكل شي بدون فوريغانا طبعا فتحية لهم على هذا الاختراع xD)

نجي الحين لتطبيقاتي المفضلة لكن بكتفي لمستخدمي الايفون لان للأسف ما استخدم غيره

orz فعذرا للجميع و يالليت اللي يعرف تطبيقات مفيدة للاندرويد يفيدنا

بس جربوا ابحثوا عنها بالاندرويد يمكن تلاقونها

 KanjiBox (بفلوس و اتوقع فيه بالموقع تستخدمه اونلاين بس صراحة ما جربت)

بالنسبة لي الافضل على الاطلاق و يستحق كل قرش عليه, سبحان الله لما كنت ابحث عن تطبيقات زينه هو اللي حسيت يناسبني و فيه احتياجاتي فجازفت و شريته والحمدلله ما ندمت ابد. اذكر اول ما حملته كنت كل يوم و كل شوي ادخله و وصلت فيه مستويات بعديه بس للأسف غيرت جوالي و راح كل شي

Memrise

يبغى له تسجيل و يصلح للمراجعة اكثر وحلو لو احد تعرفه مسجل فيه و تبدون تتنافسون مين يحصل نقاط اكثر.. له موقع بعد اذا كنت تحب استخدام الكمبيوتر اكثر من الجوال

HelloTalk

نفس 8-لانق قريبا من ناحية المساعدة بس هنا انت تساعد يابانين فقط و اليابانين الذين يتعلمون العربية هم فقط من يستطيعون مساعدتك,وفيه اختلاف اخروهو انه 8-لانق لكتابة مقال (او موضوع او مذكرة) بينما هالوتوك محادثه بينكم وعكس أي مكان تقابل فيه يابانين يبون يتعلمون لغة بس ما يعطونك وجه هذا من اول يوم او يومين اضمن لك راح تلاقي احد

Furigana

من اسمه هو تطبيق تلصق فيه كانجي او جملة (بعد ما تنسخها من تويتر مثلا او أي مكان) و يطلع لك الفوريغانا حقتها فالبتالي بيسهل عليك كثيرررر الفهم و تتعلم كانجي زياده (انبه هنا اني صحيح قلت بالبداية انكم لازم تبدؤون بكانجيات المرحلة الاولى لكن هذا لا يعني عدم تعلم كانجي جديد خارج القائمة بس اهم شي يكون تركزيك على المستوى الاول عشان ما تتلخبط)

اخر شي بتكلم عنه المواقع

japaneseclass

تقريبا زي ميمرايز بس بنظري احسن وامتع بكثير, يستخدم نظام العاب الار بي جي اللي احبها مره وكل ما جاوبت صح انرفع اللفل حقي.. هم ممتع مع الاصدقاء اكثر (اللي يسوي حساب يقول لي عشان اضيفه و اتحمس اكثر.. انا حاليا لفل 3 =P)

هذا كل شي اتذكره حاليا لو تذكرت زياده راح اضيفه لكم هنا (بالذات اني غيرت جوالي و لابي فراحت اشياء كثير +  orz توقفت عن الدراسة لمدة نصف سنه تقريبا فنسيت اشياء

 وعلى فكرة كل شي ذكرته ينطبق ع الكلمات فا ادرسهم مع بعض بيكون شي ممتع جدا

نلقاكم في مدونه اخرى و اللي يبيني اشرح عن شي معين بتفصيل اكثر لا يتردد بالطلب لاني ابغى اساعد اكبر عدد من الناس انهم يكملون دراسة اللغة اللي يحبونها =)

じゃまたに